د / عادل صقر - أخصائى التغذية وخبير التوعية الصحية والإعلام الطبي
"بعمل دايت وبتمرن ومفيش فايدة! وزني ثابت مهما عملت".. لو سمعت الجملة دي أو قلتها لنفسك قبل كده، قد يكون السبب الخفي هو: مقاومة الأنسولين.
إيه هي مقاومة الأنسولين ببساطة؟
الأنسولين هو الهرمون المسئول عن إدخال السكر من الدم إلى خلايا الجسم ليستخدمه كطاقة. لما الجسم يصبح أقل حساسية لهرمون الأنسولين، بيضطر البنكرياس يفرز كميات أكبر منه عشان يحافظ على مستوى السكر طبيعي. هنا يبدأ الجسم في تخزين الدهون بشكل أكبر، ويصبح فقدان الوزن أصعب.
ليه مقاومة الأنسولين بتسبب ثبات الوزن؟
الجسم بيبقى في حالة تخزين دائم للدهون.
الشعور المستمر بالجوع والرغبة في تناول السكريات.
صعوبة حرق الدهون حتى مع ممارسة الرياضة.
زيادة الالتهابات الداخلية اللي بتعطل عمليات الأيض.
مين أكثر عرضة للإصابة بيها؟
الأشخاص اللي عندهم زيادة في دهون البطن.
اللي عندهم تاريخ عائلي للسكري.
قلة الحركة ونمط الحياة الخامل.
التغذية السيئة الغنية بالسكريات والنشويات البسيطة.
النوم المتقطع والتوتر المزمن.
هل في أمل؟ أكيد.
مقاومة الأنسولين مش حكم مؤبد، ولو اتعرفت بدري واتعالجت بشكل صحيح ممكن تنقلب الموازين تماماً.
نصائحي العملية:
1. تقليل النشويات السريعة (الخبز الأبيض، الحلويات، المشروبات الغازية).
2. زيادة البروتين والألياف في كل وجبة.
3. ممارسة تمارين المقاومة بانتظام.
4. النوم الجيد على الأقل 7 ساعات يومياً.
5. إدارة التوتر (تعلم تمارين التنفس _اليوجا - التأمل - المشي الهادئ).
6. متابعة طبية دورية مع تحاليل بسيطة زي السكر التراكمي وقياس الإنسولين الصيامي.
رسالة مهمة:
لو حاسس إن وزنك ثابت رغم كل محاولاتك، لا تيأس.. أحياناً العائق مش ضعف الإرادة، بل خلل داخلي محتاج تدخل علمي محترف.